საქართველოს ვირტუალური სახელმძღვანელო

,,კოლხური ტყეები და ჭარბტენიანი ტერიტორიები“ UNESCO-ს მსოფლიო ბუნებრივი მემკვიდრეობის უბანი ქობულეთის მუნიციპალიტეტში -  კინტრიშის დაცული ტერიტორიები სოფელ ცხემვანსა და ხინოს მთის შუაა მოქცეული, ქობულეთიდან 20 კმ-ში. კინტრიშის დაცული ტერიტორიების ქვემო საზღვარი ზღვის დონიდან 250-300 მეტრზე გადის და მთლიანი რელიეფი ღრმა ხეობებითაა დასერილი. ნაკრძალის წყლის მთავარი არტერია - მდინარე კინტრიში - სათავეს ხინოს მთიდან იღებს და ქალაქ ქობულეთის სიახლოვეს შავ ზღვაში ჩაედინება.  კინტრიშის დაცული ტერიტორიები გამოირჩევა ძუძუმწოვრების, უხერხემლო ცხოველებისა და ქვეწარმავლების, მათ შორის ადგილობრივი, უძველესი და გლობალურად გადაშენების საფრთხის წინაშე მყოფი სახეობებისა და ჯგუფების მრავალფეროვნებით. აქ სრულადაა შემონახული მესამეული გამყინვარების პერიოდის ტყის უძველესი სახეობები, რომლებიც ცნობილია „კოლხური ფლორის“ სახელწოდებით. კინტრიშის დაცული ტერიტორიები ძუძუმწოვრების 48 სახეობის საბინადრო ადგილს წარმოადგენს; 

დაცული ტერიტორიის ვიზიტორთა ცენტრთან ახლოს ცხემვანის წმინდა გიორგის სახელობის მამათა  მონასტერი მდებარეობს, ხოლო 17 კმ-ში - ხინოწმინდის იოანე ნათლისმცემლის სახელობის სამონასტრო კომპლექსია აღმართული. ხინოწმინდის შვიდსაკურთხევლიანი უნიკალური ტაძრის აგების თარიღად X-XI საუკუნეები მიიჩნევა.

ქობულეთის მუზეუმში 6500-ზე მეტი სამუზეუმო ექსპონატია დაცული, რომლებიც წარმოადგენენ ისტორიულ, ეთნორაფიულ, ხელოვნების თუ ბუნების წიაღში ნამარხ ნიმუშებს.

მუზეუმში წარმოდგენილია სოფელ ქობულეთსა და ხუცუბანში პირველყოფილი ადამიანის ნამოსახლარებზე აღმოჩენილი 9 000 წლის წინანდელი შრომითი და ყოფითი ნივთები,  როგორც ადრე ბრინჯაოს, ისე ბრინჯაო-რკინის ხანის მასალები: სხვადასხვა საყოფაცხოვრებო ჭურჭლის ფრაგმენტები საკულტო-რელიგიური ნიშნებით, კოლხური ცული, ქვის საწაფები და სხვა, ხოლო ანტიკური პერიოდი წარმოდგენილია ფიჭვნარის ძვ.წ. V-IV სს-ის კოლხური და ელინური სამაროვნებით, სხვადასხვა დანიშნულების თიხის ნაკეთობებით, სამკაულებით, რომაული და ანტიკური ამფორებით, აქვეა დაცული ვერცხლის ფული, კოლხური თეთრები და ცნობილი სინოპი. მუზეუმში დაცულია XVIII-XIX სს-ში ე.წ. დედაბრული ხელით გადაწერილი შელოცვების წიგნი, ასევე ისპანის ტორფნარში ნამარხი რელიქტური ტყის ნარჩენები.

მუზეუმს გააჩნია კინოდოკუმენტალისტიკისა და საკონფერენციო დარბაზები.   

საკალმახე მეურნეობები და ქობულეთური სამზარეულო დასვენებას უფრო გემრიელს ხდის! საკალმახე მეურნეობებს შორის ერთ-ერთი გამორჩეულია „ქობრონა“, რომელიც ქობულეთიდან 10 კმ-ში მდებარეობს.

ქობულეთის დაცული ტერიტორიები - ,,კოლხური ტყეები და ჭარბტენიანი ტერიტორიები“ UNESCO-ს მსოფლიო ბუნებრივი მემკვიდრეობის უბანი ქობულეთის მუნიციპალიტეტში. ქობულეთის დაცული ტერიტორიები 1999 წელს შეიქმნა, მოიცავს ქობულეთის სახელმწიფო ნაკრძალსა (331 ჰა) და ქობულეთის აღკვეთილს (439 ჰა), მდებარეობს ქალაქ ქობულეთის ჩრდილოეთით, შავი ზღვის გასწვრივ, ფიჭვნარის ეკოპლაჟიდან დაახლოებით 300 მეტრში. ისპანი I-ზე დღევანდელი მდგომარეობით წარმოდგენილია ნახევრად დეგრადირებული, მეორადი მცენარეული დაჯგუფებები, ხოლო ისპანი II წარმოადგენს უნიკალურ სფაგნუმიან ტორფნარს. ქობულეთის დაცული ტერიტორიების ვიზიტორთა ცენტრი საინტერესოა ვიზიტორებისთვის, აქვე შესაძლებელია ჭაობის თხილამურების დაქირავება და სფაგნუმიან ტორფნარზე გასეირნება. 1997 წლიდან ისპანი II რამსარის კონვენციის საერთაშორისო მნიშვნელობის მქონე ჭარბტენიან ტერიტორიად გამოცხადდა, რომელიც მიგრირებადი და მოზამთრე ფრინველების დასასვენებელი ადგილია. 2021 წელს კი UNESCO-ს მსოფლიო ბუნებრივი მემკვიდრეობის უბნად გამოცხადდა.

უნიკალური სასტუმრო კომპლექსი შატო კვირიკე 2021 წელს გაიხსნა. ის უამრავ საინტერესო სივრცეს სთავაზობს სტუმრებს - მარანს, აუზს, რესტორნებს, ისტორიულ ნაგებობაში განთავსებულ პატარა მუზეუმს, საკონფერენციო და საბანკეტო დარბაზებს, უნიკალურ რეკრეაციულ გარემოს - ასწლოვანი ევკალიპტებით, ვენახებით, თხილისა და კივის ხეივნებით. ულამაზესი ხედებით და ტრადიციული გარემოთი, შატო კვირიკე სთავაზობს 23 სხვადასხვა კატეგორიის ნომერს და 15 კოტეჯს განთავსებისთვის.

სოფელ ციხისძირში მდებარეობს ჩვ,წელთაღრიცხვის VI საუკუნით დათარიღებული, უძველესი ციხე-ქალაქ პეტრას ნანგრევები. ეს ტერიტორია ისტორიულად ერთ-ერთი ქართველური ტომის - ლაზების სამოსახლო იყო. უნიკალური სამხედრო-სტრატეგიული და სავაჭრო-ეკონომიკური მდებარეობის გამო, ბიზანტიის იმპერატორმა იუსტინიანემ აქ ქალაქი გააშენა. ქალაქის ტერიტორიაზე გადიოდა უმნიშვნელოვანესი სახმელეთო გზა, რომელიც ერთმანეთთან აკავშირებდა დასავლეთ საქართველოს, ბიზანტიის პროვინციებს, ირანსა და სომხეთს. ასევე კარგად იყო განვითარებული საზღვაო ნაოსნობა. შუა საუკუნეებისათვის პეტრას ციხე იმდენად მიუდგდომელი გახდა, რომ მას ქაჯეთის ციხე უწოდეს.

მტირალას ეროვნული პარკი მდინარე ჩაქვისწყლის ხეობაში, სოფელ ჩაქვისთავში მდებარეობს. მისი საერთო ფართობი 15698,8 ჰა-ს შეადგენს. ეს აღმოსავლეთ ევროპაში ყველაზე უხვნალექიანი ადგილია. მტირალას ეროვნული პარკის უნიკალურმა კოლხურმა ტყემ და უიშვიათესმა ბუნებამ განაპირობა ის, რომ მტირალას ეროვნულ პარკს UNESCO-ს მსოფლიო ბუნებრივი მემკვიდრეობის სტატუსი მიენიჭა. აქ შესაძლებელია დაიგეგმოს ერთი და ორ-დღიანი ტურისტული მარშრუტები. ბილიკები მარკირებული და კეთილმოწყობილია. მოწყობილია საპიკნიკე და საკემპინგე ადგილები. დიდი ინტერესით სარგებლობს კოლხურ ბზასა და სუროში ჩაფლული ჩანჩქერი, რომლის სიმაღლე 12 მეტრს აღემატება. აგრეთვე, ჩანჩქერიდან დაახლოებით ერთ კილომეტრში მდებარეობს გამდინარე, გამჭვირვალე და კალმახებით მდიდარი ტბა, რომელშიც კლდეებს შორის მოჩუხჩუხე მდინარე ჩაედინება. მტირალაზე შესაძლებელია ეკო, სათავგადასავლო და სამეცნიერო ტურების მოწყობა.

სოფლად ტურიზმი - მცირე ბიზნესის პერსპექტიული ტენდენცია! სოფელ ლეღვაში ესაძეების ოჯახი ხშირად მასპინძლობს ვიზიტორებს მათ 160-წლის ხის სახლში.

ღვინის სახლი სტუმრებს საშუალებას აძლევს ნახონ უნუკალური ვაზის ჯიშები, რომელიც მდებარეობს „აგრო სერვის ცენტრი“-ს ტერიტორიაზე სოფელ გვარაში. აქ ტურისტებისთვის მრავალფეროვან, საინტერესო და მიმზიდველ ინტერიერს ქმნის ღვინისა და მასთან დაკავშირებული რეწვის ნიმუშების საგამოფენო დარბაზი, ენოთეკა და ეთნოგრაფიული კუთხე. საგამოფენო სივრცეში კი ღვინოსთან ერთად სტუმრებს საქართველოში წარმოებული პროდუქტებისა და სუვენირების დათვალიერება-შეძენა შეუძლიათ.

ჩეხედანას წმინდა გიორგის მონასტერი სოფელ ლეღვას თემში, სოფელ ცხრაფონაში მდებარე მცირე ზომის დარბაზული ნაგებობაა. ის 1609 წელს ააშენა მამია II გურიელმა თავისი მცირეწლოვანი შვილის, მანუჩარის სულის საოხად. ტაძარი იერუსალიმის პატრიარქმა თეოფანემ აკურთხა. ჩეხედანას ეკლესია იერუსალიმის ჯვრის მონასტრის მეტოქად დადგინეს, რაც იმას ნიშნავდა, რომ გურიაში ჩასულ იერუსალიმის პატრიარქს წირვა აქ უნდა აღესრულებინა. ის ბაილეთის და მამათის ეკლესიებთან ერთად იერუსალიმის საპატრიარქოს კუთვნილება იყო.

მთლიანად დანგრეული ეკლესია ძველის საძირკველზე ხელახლა ააშენეს XX საუკუნის 90-იან წლებში